二人女子組合Twins前晚出席婚紗博覽會，穿上婚紗的蔡卓妍（阿Sa）行騷時不慎踩到裙內鋼紗，要師弟洪卓立幫手整理，非常論盡。有網上新聞指阿Sa已跟鄭中基分手，還跟圈外男友同居半年，阿Sa聞言大鬧黐線，還指自己不會跟男友同居。
組合Twins、洪卓立和陳家樂前晚在灣仔會展出席「香港婚紗博覽2007」，蔡卓妍穿上婚紗跟洪卓立配成一對，鍾欣桐（阿嬌）則配陳家樂。穿上婚紗的阿Sa頗為論盡，行騷時不慎踩到裙內鋼紗，要身後的洪卓立為她拉起裙襬，豈料卻拉得很高，要旁邊的阿嬌提醒他不要拉太高。
大罵黐線
事後阿Sa笑言自己行為粗魯，要去學儀態，她說：「頭先高踭鞋踩到條裙嘅鋼紗，搞到郁唔到，我影婚紗相時都踩爛咗個鋼紗。」阿嬌也說：「阿Ken（洪卓立）幫佢拉得好高，我即刻叫佢拉番低啲。」
日前內地搜狐網上有報道指阿Sa已跟鄭中基分手，原因是不能忍受男友食手捲煙及常去派對，還指她已跟另一圈外男友秘密同居半年，阿Sa聞言說：「黐線，冇可能。」阿嬌也搶着說：「吓？嗰個男仔邊個嚟，有個圈外男友點會我唔知，凡係男友都要畀我過目，我係佢管家婆。」阿Sa續說：「好無聊，網上新聞完全唔使負責任。」問她是否跟鄭中基分手，她說：「一向唔回應有關拍拖同緋聞事，可能大家覺得我緋聞少，作啲咁嘅嘢畀我，我都想知嗰個係邊個，同我行咗半年。」續問她拍拖時可會跟男友同居？阿Sa說：「唔會，我一定唔會同人同居，係啲人自己幻想出嚟。」
攝位有理
問阿Sa是否很少見其朋友（指鄭中基），她說：「有同冇都唔會回應，有證據咪寫，我唔介意，唔好生安白造。」記者謂此行食得鹹魚抵得渴，阿Sa說：「惟有咁諗。」不過阿嬌說：「唔係呀，我都係普通人，我都有私隱權。」此外，洪卓立昨日在中環出席慈善活動，談到日前出席《翡翠歌星賀台慶》拜神時攝上前排博上鏡，他說：「校長（譚詠麟）叫人埋去，不過其他人冇反應，得我行咗埋去啫。」
採訪、攝影：胡比、卓美娟、陳慧安
