過埋Halloween，就嚟又到聖誕，自己plan定旅行計劃之餘，諗起爸爸媽咪都好似好耐冇遠行，喺Auntie方口中收風，據聞爸爸媽咪想去北京睇吓奧運場館、見識吓祖國嘅偉大，敏妮於是發揮孝順女本色，提出請佢兩老去旅行，點知媽咪話：「敏妮，搵錢辛苦，唔好亂使。」
聽完耳際立即響起一句「世上只有媽媽好」，爸爸媽咪已經退咗休，其實好應該享受吓生活；但另一方面，對於佢哋嚟講，就踏入資金「淨流出」嘅歲月，雖然爸爸媽咪都有投資股票，但上一輩慣咗積穀防饑，所以用錢好審慎，敏妮拗佢哋唔過。
人老都唔使困喺間屋
星期六聽咗個talk，畀到啲靈感敏妮。個talk係由一個保險業嘅知名人士做主講嘉賓，主要講財務策劃方面嘅問題。佢提到以前一個client嘅退休計劃，為咗令個客可以維持退休前嘅生活質素，佢幫個客分配過啲資產，各按需要做中線及中長線投資，等佢喺退休後不同時期，都有足夠投資收入應付生活。
另外，佢亦喺投資金額中，抽咗萬零二萬蚊，獨立做咗個「旅遊基金」，始終退休唔代表從此與世隔絕，退休生活應該多姿多采，唔係成日困喺屋企或者屋企樓下個clubhouse，老人家都想得閒出去睇吓個世界。
目的地視乎基金表現
講番個旅遊基金，由於目標係作為旅行使費，唔係靠佢開飯，所以可以承受較高風險，博高回報，正如嗰位講者話，贏咗咪去美國拉斯維加斯，輸咗最多去澳門威尼斯。
敏妮於是用呢招游說爸爸媽咪，話注資為佢兩個設立旅遊基金，兼幫手管理，而佢哋每年去邊度旅行，就視乎基金表現。不過，呢個基金為咗吸引佢兩位落叠，首年先送上雙人北京之旅！
http://manlitalk.com/blogs/