萬聖節鬼聲鬼氣，有人向八方報料，指無綫電視竟然日光日白鬧鬼！話說10月30日晨早新聞，靚女主播龔偉怡報新聞時，畫面右下角竟然突破出現一隻「鬼手」，迅速喺鏡頭前拎走一件紅色物體，鏡頭前見到陣鬼影，觀眾睇到咪話唔驚！
拎走蘋果穿崩
事後有人逐格重看片段，終於揭破呢個鬼手驚魂。原來係有工作人員伸手攞走枱面個蘋果，一時唔小心隻手上鏡，就出現「鬼手」穿崩一幕。無綫新聞部主播崇尚健康飲食，早前俾觀眾發現報新聞時有隻蕉放喺枱面，今次改食蘋果，唔想個蘋果出鏡，點知輪到隻手出事。
呢個蘋果係邊個嘅呢？當日晨早新聞由龔偉怡同盤翠盈坐鎮，蘋果放喺盤翠盈旁邊，相信係佢嘅早餐。另一女主播Ada龔偉怡有唔少fans，好多人讚佢靚女，「佢五官好精緻，樣子更可愛」，係「珠珠」趙海珠離巢後「TVB最可愛女主播」咁話！
據電視迷提供資料，Ada就讀於聖母無玷聖心書院，03年中大新聞與傳播學系畢業，加入無綫新聞部財經組，除主持晨早新聞，亦係《財經透視》主持，吸引一班非股民睇財經節目。
