警方犁庭掃穴式沒收住好啲「拾肆K」T恤引起唔少爭議，港島區補選候選人何來似乎對警方行動睇唔過眼，噚日着咗件印住「14K」字眼嘅白色T恤出席候選人簡介會，擺明挑戰警方。
何來件Tee似乎係DIY，除咗「14K」字眼，仲有「K14」、「4K1」等，佢畀記者影相時舉起手指公表現得戚，警方對咁有創意嘅作品，唔知會唔會採取行動？
選舉人人都想掛多啲街板宣傳，候選人之一大律師李永健卻玩低調，選管會噚日分配掛街板位置畀八名候選人，李大狀卻好客氣話唔需要，佢嘅位置可以分配畀其他候選人。補選要掛百幾塊街板，塊塊都要計數，唔掛慳好多錢。