肥彭下次返香港，可能有新口味蛋撻食。泰昌整撻師傅歐陽天閏兩年前收咗個徒弟王震，學藝兩年終於下山，仲研製出麥粉低脂低反式脂肪高纖蛋撻。現年30歲嘅王震15歲入行，以前只識用機器做餅，「阿嬸都識做」，師從歐陽天閏後先知造撻大有學問，香港人又為食又怕肥，所以創出呢款健康蛋撻。
王震話泰昌蛋撻傳統係新舊粉各半，即係先搓一半蛋撻皮擺隔夜，翌日再搓另一半新皮混合，焗成撻底先夠鬆脆，由於新撻底改用麥粉，失敗多次先有滿意效果。呢款健康蛋撻係渣打書節「限定版」，只在今個月8號至11號喺維園有售，每個6蚊。歐陽天閏指健康蛋撻成本高傳統蛋撻一倍，隨時賣一個蝕一個，反應好先正式推出。八方試過味，新撻冇咁甜，撻底口感似消化餅。