乘當上10月份盟主之勢，希望可以帶旺本欄，今周繼續避開亂局兼下周中又開快車嘅英冠，捧英超紐卡素上盤，串荷甲阿爾克馬爾大炒奈梅亨。
上周六貼飛腳3:1，竟開對家心跳贏3:1，反而翌日卻在名家擂台貼中川崎前鋒「客其他」50倍波膽，證明喺本欄畀貼士尚差多少運氣；不過賭波最緊要注碼運用得宜，長路漫漫希望在明天。
今期首選地頭蟲紐卡素，上次作客負雷丁係正常賽績，原因近年成績欠佳，與始終擺脫不了客場不濟嘅命運有關，姑勿論新帥「大Sam」艾拿廸斯能否扭轉頹勢，賭波逐場計，今次返主場，面對同屬中上型班嘅樸茨茅夫，憑現場5萬多人氣勢，少讓平/半反而有追捧價值。
4大論點 老樸必敗
捧紐卡素有4大理由；1：他們今季聯賽主場5戰4勝，強如熱刺及愛華頓俱喺聖占士公園球場失3球敗走；2：近6次主場對老樸，亦錄得5勝1和，去年3次碰頭，對手全敗兼食蛋，由南征北，真係有影響；3：老樸剛在周中聯賽盃派出大半主力，但主場仍以1:2負布力般，反觀紐記無賽事得以休息；4：阿倫史密夫或復出，與奧雲及馬田斯打3箭頭。根據上述論點，我決定加注出擊。
AZ復蘇炒得起
荷甲另一支漸復蘇嘅阿爾克馬爾（AZ）。海倫芬反彈，聯賽3連勝令我進賬不少，股市大旺同類股票輪流炒，另一支實力更強嘅AZ今迎奈梅亨，係時候發難。今季射手高化文斯離隊始終有影響，不過來自瑞典卡馬亞嘅巴西前鋒阿里漸融入球隊，前仗足協盃作客俄羅斯辛尼特，大部份時間踢少個仍和1:1，上仗返聯賽作客即3:2勝NAC，確認復蘇，今迎中型班嘅奈梅亨，馬會開出[-1]主勝得1.9倍，莊家壓低賠率，我更有信心了，最重要下周中足協盃輪空，今晚不拼待何時？
近5場往績：走輸輸輸輸
蘋果波神
股市大旺，英超盛世，大家齊來贏多啲！