阿里巴巴（1688）下周二才上市，先有網龍（8288）打頭陣，首日掛牌雖逢大跌市，仍高見19元，收市報16.52元，較招股價高出25.3%。可惜，網龍並非公開招股，只做「披成」，一般散戶無份玩。
講起網股，老友Kevin告之星俠，話說佢某日午飯，聽見鄰座不遠幾位身穿校服的學生哥互相猛問「阿里巴巴」係乜？仲問幾時有個咁嘅網？反映原來真係好多學生哥有留意股市消息，睇嚟學生哥炒股的確幾普遍，另外，亦顯示該B2B網站有唔少年輕人唔識。我就話，除非你係做生意，否則一般人係毋須上「阿里巴巴」個網。
港股大瀉超過千點，港交所（388）變成「避難所」，股價照升可也。個別券商股近日亦見異動，其中結好控股（064）逆市抽升8%，高收0.91元，市傳集團計劃與內地大型金融機構合作，以客戶轉介形式擴大證券業務，變相開拓內地客源，有助收入增加。
候造旗時吸納
受惠年內大市熱爆的成交量，結好佣金收入理應水漲船高。集團證券業務營業額平均每月介乎150億元，以0.1%佣金計，折算單月佣金便達1500萬元，僅是佣金收入半年已有9000萬元。另集團去年4月以1.07億元購入的九龍城露明道住宅地盤，剛以2.05億元易手，估計獲利逾9000萬元，料可於07年年度業績入賬。結好近日升勢急勁，料可更上一層樓，惟技術上已呈超買，可趁股價回落營造旗形時吸納，以0.66元止蝕。