第40屆東京國際車展已告一段落，除咗車迷可大飽眼福，睇盡最新ConceptCar、超性感RacingGirl之外，就連Game迷都期待呢一日！點解？話說SONY王牌作《GT5Prologue》要等到12月先正式上市，但試版已可上網單撈，更重要嘅係，神秘戰車日產GT-R終於曝光，Game迷已可搶先試揸！
記者：陳國輝
多達16架同時比賽
好多人會將《GT5Prologue》嘅重點放喺CG度，PS3固然機能勁，食得起要求龐大數據量嘅3D畫面，然而大家似乎忽略咗遊戲性本身，而變得本末倒置。今集最大改良，就係賽道上首次加入最多16架跑車，比傳統PS2版多咗10架，氣氛肯定熱鬧好多！除咗同電腦片車，你仲可透過PS3上網功能和其餘15人比賽，成績同排名會List出嚟畀全世界睇，代表香港爭光，威到盡啦！至於試版內暫時得7架車畀用家揀，除日產GT-R，仲有三菱EVOX、IMPREZAWRXSTI、凌志ISF、萬事得ATENZASPORT、大發OFC-1以及寶馬135iCoupe。有本地Game迷大讚凌志具備8前速，跑直路非常快；亦有人特別鍾意GT-R，話佢馬力特強，可惜現時僅得一條鈴鹿賽道，別無他選，局限了某些跑車未能發揮出最大本色。
追加超真實車內視點
街機如《頭D》、《灣岸》等系列，雖然車內視點已經唔係新嘢，但在於《GT5Prologue》嚟講，呢項新增功能似乎大大加強比賽時嘅真實程度。玩家會睇到高達100%仿真度嘅錶板、轉數錶以及油缸等使用情況，咪以為呢啲儀器用嚟裝飾喎，其實喺比賽過程中，玩家要根據這些資料來決定如何加速、甩彎以及平衡車身，少啲真材實料都未必舞得掂！但話說回來，有玩家嫌遊戲內並未加入最過癮嘅手動轉波部份，因為咁要搞到隻Game延遲推出唔抵嘛！
單撈高清劈車短片
《GT5Prologue》另一賣點係可隨時Update最新影片，遊戲內特設一項叫「GT-TV」嘅功能，入面不時有新影片出現，一按Download後便可慢慢欣賞。試玩版已有相當豐富嘅節目種類，如日本SuperGT超級賽事精華、甩尾王土屋圭市示範法拉利跑山路，最新影片更有GT之父山內一典喺落雨天濕地上狠劈同扭沙林等，幾精采㗎！唯一要彈係下載時間稍長，始終係高清質素，畀啲耐性喇。
CG實物真假難分
PROFILE
機種：PS3
開發：SCEI
類型：賽車
玩家：1至16人
推出日期：12月中旬