聯儲局減息，大淡友可能有啲失望。畢竟，減四分一厘，算低於預期，阿伯嘅潛台詞係︰「情況唔算好差。」另一邊廂，有人出口術唱好香港，話港紙升到要脫鈎，搞到阿任要出嚟收美金。
冇法子，呢啲係聯繫滙率嘅代價，鬼叫我哋信唔過國金頂樓咩！唔係話阿任唔叻，只不過，試想假若香港有朝一日，有自己嘅貨幣政策，結果會點？
今時今日，班尊貴見到物價升，最多都係要求政府帶頭加人工；不過，如果畀佢哋知道濫發鈔票可以大興土木，仲可以激發通脹，令人工不斷上升，睇怕香港都會再創下另一個世界紀錄都似︰通脹創下世界紀錄囉。
唔係嚇大家，真係有件尊貴曾經提出過，要政府買番晒啲私營隧道，要成立道路管理局，然後由佢哋話收幾多錢就幾多。畀佢知道原來鈔票可以無限印製，佢仲唔當競選單張咁印？分分鐘擴大建議，直頭國有化所有公共交通運輸，然後嚟個免費搭車搭船搭地鐵，好唔好？究竟邊個尊貴咁民粹？世民無謂開佢個名啦！不過，如果大家有興趣，可以上Google試搵。
求神拜佛，阿任真係要死守聯滙，我寧願忍受耐唔耐一次負利率、久不久一次通縮，我都唔想畀人將香港反轉。人家今次「衝擊」嘅，又何止我哋？歐、英、澳、星、泰、菲、韓、印……大家嘅貨幣都升咗好多，係美金唔掂啫！我哋畀人質咗啲美金，冇錯係蝕少少水，不過保住港元獨立地位，值得。港紙偏低，當鼓勵港人留港消費，去少幾次旅行囉！
寄望美國佬改過
話說回頭，其實炒家衝擊港元嘅玩法，又真係幾「屈機」（gamethesystem）︰先大手買港紙，質金管局食美金，然後用港紙響香港買嘢（當然唔係去超市掃貨啦！），等你物價升，有民生壓力，若然港元脫鈎，佢就賺滙水，唔脫鈎，佢成手貨，一樣賺。聯儲局話未必會再減息，呢個暫時係共識。不過，若然佢哋有變數，嘿！一樣要再放水，到時阿任又要畀人質美金落袋，如是者，直到美國佬改過自新。
鬼佬M話，下屆美國可能會選個平衡預算總統，到時話唔定可以解決雙赤，亦話唔定可以解決埋通脹加信貸危機呢個兩難。不過，下屆總統？等多一年半載啦！