時下一般嘅信用卡，大多數都係硬膠製造（嗱，華華唔係孫柏文，硬膠真係講緊製造物料），唔理普通卡、金卡定白金卡，成本平均幾蚊一張，普通過普通！向來標榜尊貴，只係「ByInvitationOnly」嘅美國運通Centurion卡，即係我哋「尊稱」嘅黑卡，近排就搞搞新意思，改用鈦金屬製造，成本貴一般信用卡成百倍，冇錯，即係幾百蚊一張，夠尊「貴」喇啩！
美國運通話，用鈦金屬做物料，全世界得呢張黑卡啫，而全球亦只係得幾個地方可以做到，澳洲就係其中一個，每日產量唔過100張，所以只可以慢慢咁幫啲舊客換新卡。佢哋又話，張卡嘅重量係普通卡3倍，都幾重手㗎，有啲客攞到手後，試過用火燒都冇事，你都咪話唔堅呀！