噚日萬科主席王石出席公司新logo記者會，副主席宋林喺台上致辭時，呢位主席一時技癢，拎咗部數碼儍瓜機出嚟，幫宋林影相，唔通佢想撈埋攝記嗰份？
華華記得王石嘅blog有唔少佢登山同旅行時映嘅相，水準有番咁上下，唔似新手，王石話，玩攝影有十年，仲早過登山，佢仲話冇學過攝影，都係自己影影吓學番嚟，家庭活動要影相，佢就係當然攝影師。佢喺blog度提過，有次登山紮營後，本來諗住飯都唔食，喺營度瞓番覺，但聽到隊員話出面景色好靚，就即刻起身，拎起相機走出帳篷影相。你話係咪好大癮？
講番萬科新logo，由本地名設計師陳幼堅間設計公司創作，用4個V字組成。王石話，希望新logo同公司一齊成為「百年老店」喎！