【本報訊】新義安、和勝和、14K、和安樂（水房）、福義興、聯英社等均是本港老牌幫會的名稱，這些分分鐘說出來都惹禍的名稱，永遠是一個避忌。不過，著名家庭用品連鎖店G.O.D.（住好啲）鬧出「拾肆K」Ｔ恤風波惹來警方大掃蕩後，記者發現原來九龍城街市有「勝和號肉枱」和「義興肉枱」；西環和大埔有「義安茶莊」、「義安公司」，觀塘有「和樂邨」，有人說：「報紙招聘文員都寫明14K（月薪14,000元）啦！」記者：鄭大康、黃學潤
記者昨傍晚往觀塘和樂邨，其中一名住在和樂邨義安樓的老伯向記者說：「我住喺義安樓，樓下有間義安茶餐廳，如果差人話義安（新義安）係黑社會名要拉人，咁呢幢樓都要拆？」
「叫義安又唔係新義安」
記者聽其中一街坊說，邨內的義安茶餐廳經營了數十年，從來沒有因為名字而惹來任何麻煩：「20年前，我以為呢間茶餐廳係啲社團中人開嘅，後尾知道都唔係嗰回事，叫義安啫，又唔係叫新義安。」
觀塘區區議員劉定安說：「和樂邨同和安樂、義安樓同新義安，呢啲只不過係巧合啫，呢啲名都係廖本懷做房屋司時代嘅產物。」他指和樂邨有41年歷史，是屋宇建設委員會轄下嘅廉租屋，是由當時的政府官員命名，66年入伙時每月租金要80元，住客不少是白領，包括教師、記者和公務員：「啲街坊覺得住緊嘅係豪宅，邊會諗到個名似黑社會。」劉定安笑着說。
記者昨晚來到九龍城街市，找到在區內響噹噹的「勝和號肉枱」，一名老夥計向記者說：「你都黐線嘅，個名用咗幾十年啦，又唔見差人嚟拉。」他說，數十年前，老一代在九龍城開檔，「求其」找個好意頭的名字：「當年邊有咁敏感㗎，冇乜避忌嘅。」另一名不停揮刀剁着豬內的年輕夥計搭嘴說：「冇嘢喎，蠱惑仔冇來搞過事，差人都冇話個名有問題。」
「請文員都寫明14K啦」
在街市另一端的「義興肉枱」東主唐先生向記者說：「你唔講都唔覺，我哋個名用咗幾十年，舊街市已經用緊啦。」他說，他父親和叔父當年拍檔做生意，用了「義興」這個名字：「義興嘛，個音好似義兄，兄弟之間有情有意咁解。」他指着「勝和號」說：「佢哋啲名仲行過我哋，我驚乜呀！」
記者事後再去了「義安」、「聯英」、「東英」等字號的店舖和公司等，有職員向記者說：「根本唔覺得個名有乜問題，報紙招聘文員都寫明14K啦，唔通有差人拉。」
市民反應
《14K多含意》
徐先生：「14K除咗黑社會之外，其實可以代表好多嘢，人工啦、金飾啦，對呢件T恤唔會太反感。」
《似文字獄》
城大生胡小姐：「14K，金囉！我唔會聯想到黑社會，只係一啲字啫，如果違法就好似文字獄。」
《扼殺創作》
學生郭先生：「呢個設計好特別，對警方咁做覺得好驚訝，其實咁係扼殺本地文化創作。」
《可以接受》
保險從業員陳小姐：「唔覺件衫會敗壞風氣，粗口T恤都有啦，我可以接受。」
