美國人權組織一直批評，中國支援踐踏人權嘅非洲國家蘇丹政權，搞到外資基金要沽喺蘇丹有投資嘅中石油。不過，中國進出口銀行行長李若谷噚日喺香港出席香江論壇，就主動反擊，指中國更注重蘇丹嘅人權！
佢話喺中國展開對蘇丹援助之前，當地日日都停電，百姓連電視都睇唔到，收音機又聽唔到。直到中國幫佢哋起咗兩座各40萬千瓦發電機組，𠵱家蘇丹百姓日日可以睇電視，李若谷反問，如果佢哋連資訊都接觸唔到，「還講甚麼人權自由！」係中國幫蘇丹睇到美國CNN廣播。
除咗接收資訊，蘇丹擁有全非洲最大嘅煉油廠，年產能力達500萬噸，都係靠中國提供協助同培訓人員。究竟邊個更注重人權，實在係事實勝於雄辯。
佢又介紹至06年，中國總共向160個國家提供2000多項援助，培訓咗1.8萬個管理人員，減免債務160億元人民幣。