罵李柱銘為漢奸一事，最初本以為係左派人士有組織嘅圍攻，類似文革批鬥，先扣帽子，然後搜羅種種不是「罪證」的「罪證」，口誅筆伐兼而有之，務要「人民公敵」跪到地上，痛哭認錯，自摑嘴吧。現在呢，文明啲咯，譚耀宗只係要求李柱銘道歉啫，至於道歉之後跟住有乜下文，我哋呢班「民智未開，唔應該有直選」嘅小市民，邊度會知呀。
李柱銘畀某些人鬧為「漢奸」，非自今日始，佢自己在《城市論壇》已經聽過無數次，左丁山當初冇睇過十月十八日《華爾街日報》（亞洲版）嘅文章，唔知李柱銘真正講乜。本地中文報章之繙譯，會有立場，平時亦唔敢完全相信。直到港大才女徐詠璇在《信報》專欄（十月二十七、二十九日）都大罵李柱銘之後，覺得一定要搵原文睇睇先。睇完原文，再參照十月二十九日《信報》第十二頁嘅港大才子詹德隆譯本（多謝張博士提醒），嘩嘩嘩，唔怪得陳日君樞機話「連啲有份量嘅人都亂咁講，令香港失咗水準。」識吓英文嘅學生都怕且會認為李柱銘原文算係溫和，反對杯葛北京奧運，並且要求國際間「顧及奧運對中國仍能促成的正面影響……全世界的中國人都為北京辦奧運感到驕傲……明年八月，更可能會是歷史上最驕人的一次奧運；但是，若我們只會贏得金牌，但社會在民主、人權及法治上的發展卻仍然停滯不前，全國人民實在又有何得益？」
一啲報章將李柱銘用pressforasignificantimprovementofbasichumanrights嘅pressfor等同於pressurize（施壓力），當然大錯特錯，陸谷孫《英漢大詞典》有一條，pressforananswer，譯做「催某人答覆」，亦可譯做催促、敦促，竭力勸說，唔通香港一啲自稱知識分子報紙嘅編輯連陸谷孫《英漢大詞典》都懶得查？另外，directengagement當然唔係「直接干預或介入」，而係指參與，主動要求傾偈，咁嘅意思，曾特首都鍾意用publicengagement一詞啦。香港政壇內原來好多人唔識英文，英文好好嘅曾鈺成就選擇性地「唔識」。鬧李柱銘可以有好多理由，因呢篇文而鬧佢係漢奸，唔怪得陳日君話自己都唔介意做漢奸！