李嘉欣昨日往Elements商場為珍珠名牌Mikimoto新店剪綵，一度消瘦的她透露體重已回升至108磅，但上圍沒有升cup，她笑言「夠用」，且不願因此打破金漆招牌。對於有報道指她早前與許晉亨父母吃飯，兩老離開時一臉不悅，道行高的她指從未發話便被作古仔，應問回寫文章的人。
李嘉欣昨日身穿DianevonFurstenberg新裝、腳穿自己設計的鞋履品牌VanillaSuite，並戴上價值260萬元、從日本運來的珍珠頸鏈，往Elements為日本珍珠名牌Mikimoto新店剪綵，剪綵後嘉欣到店內參觀，又試戴一條價值40萬元的珍珠頸鏈。
朋友迫「食多啲」
早前嘉欣一度消瘦得十分厲害，昨日見她已回復狀態，她說：「因為之前頻頻出席活動，得番105磅，以我嘅高度係瘦啲，𠵱家有108磅，就係俾報紙寫得多呀，身邊個個朋友都擔心我，一到食飯時就話『你瘦呀，食多啲啦』。」問她增磅後上圍有沒有升cup？她說：「升就冇升喇。」至於有否想過隆胸，她說：「自己唔想，我都係崇尚自然，夠用啦，我唔想打破自己個金漆招牌，更加唔想加工之後先嚟後悔。」
再問嘉欣日前萬聖節可有出外狂歡？她說：「有同朋友食飯，自己着咗件黐咗鑽石嘅衫，男友有一齊，不過佢冇扮鬼扮馬。」
否認飯敍不歡而散
談到早前有報道指嘉欣與許晉亨及許的父母吃飯，離開時四人均面黑黑，被形容成不歡而散，她聞言說：「你信就得囉，覺得係就係囉，唔需要多講。」那麼她與許家兩老關係究竟怎樣？嘉欣說：「呢樣毋須要同人交代，我都係睇報紙先知，原來一句說話唔講，可以作咁多古仔，咁要問番寫嗰啲人嘅觀感啦。」
採訪：DebbieLum
攝影：DickyChan
