容祖兒、崔建邦、唐詩詠同葉翠翠等前晚喺中環出席護膚品牌活動，身為代言人嘅祖兒喺赤膊上陣嘅男模身上畫圖案，現場仲有女舞蹈員跳鋼管舞。
擔任司儀嘅崔建邦同緋聞女友唐詩詠同場，但佢哋就冇合照。問崔建邦會唔會同唐詩詠合照時，佢話：「問吓我經理人先，過到佢咪得。」身旁嘅經理人即刻話：「佢今日係司儀，唔係嘉賓。」當要求崔建邦跟一眾無綫藝人包括唐詩詠合照時，佢經理人又拒絕：「唔使喇，唔係幾好。」問崔建邦係咪公司唔畀拍拖，佢話：「唔係，公司畀。」提到早前佢同唐詩詠一齊睇陳奕迅演唱會，問佢哋係咪翻撻？崔建邦笑住話：「吓？翻撻，架車死火咩？其實仲有兩個朋友，大家係好朋友。」
露腰賀台慶
祖兒好友何韻詩嘅爸爸日前生日，但唔見佢出席，祖兒話：「佢有請我，但我去唔到，要做嘢。」有指祖兒今年會喺阿詩手上攞番叱咤女歌手金獎，祖兒話：「每年都會有啲咁嘅傳聞，𠵱家未知邊個攞。」祖兒噚日為《翡翠歌星賀台慶》拜神時，透露會率領女歌手表演，佢話覺得啲歌衫性感，但由於佢擔任領導，所以只負責露腰。有指何韻詩不滿喺歌星賀台慶中嘅表演環節唔係重頭戲，所以婉拒出席，更話此舉會影響到佢年尾頒獎禮嘅成績，祖兒就話：「我唔知，但咁高興嘅日子，能夠參與都會嚟參與，相信無綫唔會咁小器。」
