《再會歡樂今宵》自播出以來，口碑收視一般，然而前晚播出的一集卻回復昔日的搞笑水準，朱咪咪模仿楊千嬅，吳家樂扮演古天樂，二人重現千嬅演唱會跟古仔激咀一幕，引得全場爆笑。
在前晚播出的《再會歡樂今宵》，舉行了一個「2007勁多積蓄頒獎典禮」，一眾藝人再次發揮扮嘢本色領獎，其中朱咪咪以楊千嬅在演唱會的造型亮相，化名「楊千萬」的她模仿千嬅唱腔獻唱《小城大市》，連唞氣聲也似到十足，其中歌詞如「買下來，放出去，炒到熱似煎堆」，與觀眾分享現今炒樓發達之道。
隔膠片使勁狂咀
其時化身成「苦仔」（古天樂）的吳家樂更靜靜飄到朱咪咪身旁，他為模仿古仔，除將面龐搽黑外，連行路扮型男的姿態也模仿得十分神似，最後二人更來一個「世紀之吻」，雖然隔着一塊膠片，但二人咀得相當投入，非常爆笑。
至於昨晚播出的一集中，就舉行「八卦法庭」，其中鄧兆尊化名「鄭DeDe」模仿鄭裕玲（DoDo），在後台時DoDo見到兆尊扮她，即說：「你扮我扮到似人妖㗎。」至於王祖藍除了模仿聲線了得，其扮嘢本領也甚有水準，他模仿汪明荃的熱咖啡造型坐在咖啡杯現身法庭，胸前還塞滿廁紙並畫上乳溝，不過就沒有剃腋毛，令人慘不忍睹。問王祖藍扮阿姐，可擔心她會嬲，他說：「應該唔會，因為都有好多人扮過阿姐。我為扮阿姐，專登整高啲陰，個鼻又畫細啲，因為我個鼻只係可以扮成龍同張學友。」
前晚擔任嘉賓的廖偉雄也是扮嘢能手，問他的心得，他說：「扮人哋係要扮嗰個人神髓，將缺點誇大。」問他可會打算復出，他說：「唔會，因為做生意，未係好穩定。」
何守信關心肥姐
此外，身在多倫多的何守信，有傳他沒抽時間回來無綫做《再會歡樂今宵》，他昨日接受商台電話訪問說：「唔係冇時間返嚟，係冇乜人接觸叫我返嚟做。呢個節目對我好重要。」問到之後會否做該節目，他說：「講真心說話，短暫慶典式嘅我唔會返嚟做，如果重組，或者再用類似形式做，咁會好啲。」問他有沒有關心老拍檔肥姐，他說：「我有了解佢嘅情況，佢個人好堅持，希望佢發揮到強大生命力。希望欣宜要孝順呢個奮鬥一生嘅藝壇傳奇人物，希望秋官一夜夫妻百夜恩，多啲關心肥姐。」
採訪、攝影：卓美娟
娛樂資料庫：《蝕到空虛》超爆笑
以往《歡樂今宵》的藝人，經常模仿當紅歌星，獻唱改編成啜核歌詞的歌曲，當中廖偉雄和盧海鵬更是「扮嘢界」的代表。
翻唱：廖偉雄《蝕到空虛》
原唱：蔡楓華《絕對空虛》
翻唱：廖偉雄《掃墓》
原唱：張國榮《愛慕》
翻唱：盧海鵬《陪着你嘔》
原唱：盧冠廷《陪着你走》
翻唱：盧海鵬《幾許瘋語》
原唱：羅文《幾許風雨》
翻唱：廖偉雄、盧海鵬《壽頭記》
原唱：達明一派《石頭記》
資料來源：《蘋果》資料室
