英、西兩地連番易帥，外界正密切留意這股「換帥風」何時席捲亞平寧半島，而列強中最有危機嘅教頭，唔使問都知係AC米蘭主帥安察洛堤。唔知係AC衰運未除，定係「肥安」時來運到，日前作客森多利亞居然大炒一場5:0；賽後，「肥安」淡淡定定大把錢剩咁樣：「一切問題經已解決！」
AC大勝狂耍太極
「肥安」賽後興奮得手舞足蹈，向意國行家「大爆」球隊致勝關鍵：「勝利證明了世事一切都講機緣，入到波咪贏咯，查實AC𠵱家嘅問題解決得八八九九喇！」聽極我求大俠都唔明所謂「關鍵」係乜，「雖然聯賽主場仍未開齋，之不過踢波就係咁，你只要入到一球，就可以再入多一球。」「肥安」唔知有冇聽過我哋非常出名嘅「皮蛋黃」講波，佢講嘢真係十足十似「皮蛋黃」一樣高深莫測。聽君一席話，勁敵祖記、羅馬同國米應該開心都嚟唔切啦。
波班忍唔住出聲插
AC上仗聯賽負於羅馬後，已係球會近24年來最差開季成績，班主貝盧斯科尼見旗下「耆英」面容憔悴，提議取消幾課操練，返屋企唞唞；而副會長加利安尼亦話打算1月用7,000萬鎊招兵買馬，但就唔知有邊個好買；再加埋兩日前連AC名宿波班，出嚟彈球隊戰術有誤，就知現時危機非輕。
童真未泯嘅「肥安」此言一出，假如江澤民都係球迷，可會出嚟潤佢一句「Sometimesnaive！」。
不過，值得AC球迷高興係，呢場波除咗卡卡入波之外，法國小將哥古夫亦射入聯賽首個入球，而基拿甸奴今季更第3度「起孖」，絕對係「走地客」至愛，下次再到「基奴」入波，追「大」係時候喇！