休息咗成年嘅嚴淑明準備再喺娛樂圈大展拳腳，早排佢專程去美國為新唱片同新書影相，仲喺唱片監製安排下同偶像Santana見面。
噚日嚴淑明話：「見到佢心情緊張到講唔到嘢，個身仲有啲震，Santana好親切好隨和，雖然大家見面時間唔夠半個鐘，但印象好深刻，佢仲請我下個月去洛杉磯睇佢演唱會㖭！」
嚴淑明喺台北八德路影咗輯當街全裸騎電單車嘅相，記得上年佢話自己患咗乳癌，要切除左邊乳房，但睇相又唔多覺有異樣，佢解釋話：「我填番左邊個胸，如果唔係邊大邊細會好怪。填番正常之後，自己個信心都返晒嚟。我承認我整過個胸，但就冇整容。」
擾亂台北交通
影相當日，嚴淑明話有啲騎電單車嘅人，因為掛住望佢而停唔切車，搞到撞埋前面部車度，有啲人又專登不停Uturn，場面好搞笑。
