久未去過澳門，上星期六跟埋青姐、聲哥、威哥以及幾位基金代表到澳門，親身體驗吓澳門氣氛。坐TurboJet豪華客位原來都幾舒服，一小時就到，豪華客位乘客落船可以行先，好快就到咗入境關卡，出到碼頭外，唔使五分鐘。過關時聽見兩位男女關員傾偈，男士對女士話：「佢哋嚟澳門炒貴晒啲樓，我哋點買得起呀？」男士口中之佢哋，究竟指邊啲人，木宰羊！據講澳門豪宅價格狂升，氹仔新豪宅呎價去到每呎八千元，都幾驚人，一般平民樓價介乎二三千元之間。
去到投資講座所在地，澳門旅遊塔隔籬嘅會議中心四樓，大堂面積約有我哋灣仔會展中心舊翼大堂嘅三分二，甚為廣闊，場內擺咗成千座位，主辦機構中國建設銀行（澳門）可算信心十足。
開壇前，大家先到三樓嘅「南湖」飲茶吃飯，左丁山話要鐵觀音，青姐話要普洱，聲哥話要壽眉。點知侍應竟然回答話：「一張枱要三壺茶，好混亂，容易斟錯茶，我哋只係畀一壺茶嘅啫。」大家聽到，為之愕然，唔明白呢啲係乜嘢服務態度。結果女侍應只係奉上鐵觀音啫，其他兩款一於唔畀。算了吧，費事勞氣，幸好呢間「南湖」嘅點心尚算不錯，大家吃得滿意。
飯罷返回會場，已經全場滿座，座無虛設，原來澳門人炒股之風氣，與香港一模一樣。𠵱家香港每個星期六、日，最少有兩場投資講座，每場有七、八百人，阿聲哥係講座紅星，香港澳門兩邊走，唔怪得可以頻頻換新車。一啲澳門聽眾好有錢，講明「及時賣晒滙豐，改買建行、交行、招行，賺多三百萬元！」牛市特別多股神，人人都醒。
澳門賭業單天保至尊，吸引大量遊客，問題係除咗搭免費巴士到賭場之外，想搵架的士都幾難。下午五點講座完畢之後，大家心急趕船返香港，但搵唔到的士，令啲基金代表心急非常。青姐等人卻定過抬油，因為早有經驗，租咗一架van仔接送，只係要等靚仔聲哥啫，佢例牌俾師奶包圍唔甩得身也！