噚日，里昂宣佈，會將下個禮拜二（11月6號）當日嘅成交淨收入，全數捐去佢哋嘅主席信託（Chairman'sTrust），幫助亞洲同非洲有需要嘅人。
呢個主席信託成立背後對里昂嚟講，可以話係意義深遠，因為係紀念兩個已經過身嘅主席──里昂創辦人之一JimWalker，同埋舊年過身嘅顧家利（GaryCoull），佢哋兩個都係五十幾歲就英年早逝。
一般信託基金都有一大筆行政使費，華華知道，為咗令捐款一分一毫都用喺慈善，所以里昂會孭起晒信託嘅行政費，咁大家就唔使擔心啲捐款幫唔到有需要嘅人啦！
佢哋現任主席兼總裁RobMorrison話：「希望透過呢個信託，畀財經界聚埋一齊，同埋將嚟自股票成交嘅收入，用喺有意義嘅事上面。」喺07至08年，個信託會集中幫助亞洲嘅教育工作、改善非洲貧困同飢餓問題，亦計劃支持中國農村教育，令當地兒童有讀書機會。