讀小學嗰陣，常識科已成日話香港中西合璧；投身社會後，Fusion、Crossover忽成香港文化，越估你唔到香港人越受！之所以農夫×麥玲玲的《風生水起》潮爆歌壇加堪輿界，四捨五入犯不着太歲，今期，被捧了上天。而同名媛個名撞到七彩的5子Band朱凌凌，應了麥玲玲一歌詞讖語，點解佢揸波子我好多Coins，又演劇又出碟瓣瓣踩，還在地下浮游！姑勿論佢哋叫唔叫做踩過界，最緊要受歡迎有人Buy！
記者：馮冠芝
攝影：陳盛臣、周旭文
鳴謝：PacificCoffee、PixelCafe
麥玲玲撈過界？
「玲玲出嚟又睇掌喇，農夫今年又攞獎喇！」屬咩都好，仲未聽過農夫同麥玲玲Rap嘅朋友，好自己收埋靜靜雞去YouTube將勤補拙。《風生水起》除咗令農夫可以上台慶表演唔使坐喺側田側面，亦令一眾明爭暗鬥的女歌手發現，世事無絕對，玄學師傅都可以威脅到佢！唔通玲玲想轉行？「其實我好多嘢都想試，叫我煮食亦可以。只不過係以不同方式參透玄學。」這個答案有點官方，但記者叫師傅同農夫影相時擺個Rap的手勢，農夫二子立時護住師傅大叫「唔好」，而玲玲也是默默抓緊羅庚時，記者明白玲玲愛揸咪，更愛以羅庚看東西。
風生水起踩好多條界？
着住套裝來Rap，玲玲緊守玄學師底線，但事出有因，唔通唔抵得蘇民峰嘅《峰生水起》？兩首歌句「眉尾散儲錢難」勁似，想以《風生水起》撼《峰生水起》？玲玲未答，C君已話：「蘇民峰那首是數白欖，是另一種技巧，我們是Rap。」聞言，玲玲自豪道：「無Rap前我哋分唔清兩者分別，現在知啦。Rap有節奏……」誠如他們之間的師徒關係，記者也分不清。C君滿面認真說：「我教玲玲睇風水，佢教我Rap！」玲玲忍不住，坦率一句：「低能仔！」記者呆了呆，猜不到玲玲用Cutie得無害的面孔講句十幾歲𡃁妹台詞全無違和，可見佢同農夫Friend到後生咗N年！
友情牌出盡，《風》中歌詞批C君6永命格句句真，Rap一次農夫慳咗筆睇相費，而玲玲亦無輸蝕，歌中「羅庚最緊要睇得啱，人哋點樣講你都好閒」話中有話，借此平反年初麥師傅被指睇錯羅庚事件。「那次我說羅庚針尾指向南，其實是講錯不是睇錯，所以要用Rap練吓講嘢！」事過境遷，最後那句懶理人哋點講出自玲玲手筆，出吓氣又谷人氣，咁高招，所以我要深宵填稿紙，玲玲揸兩架波子。
樂易玲：Youreallycanrap！
覺得記者太浮誇？但首歌真係上咗勁歌，連無綫高層樂易玲都SMS玲玲大讚：「Youreallycanrap！」玄學家排排坐睇勁歌，放長雙眼睇玲玲走音。玲玲笑言：「佢哋唔知，Rap無走音可言。」6永話玲玲自創CutieRap，讚佢時都要Rap一Rap：「玲玲Rap又一Take、錄又一Take，無嘢挑剔！」明撈過界又點，撈得「風生水起」，踩界又何妨？
潮唱《風生水起》
朱凌凌都無條界！
明明10個人仲有7個會將佢哋同史上最靚港姐朱玲玲混淆，但偏偏英皇肯為佢哋出碟！講緊嘅係由5個舞台劇演員夾成，集不同藝術表演的組合——朱凌凌。
朱凌凌成立兩年，媒體最愛問其名字由來，簡單而言是成員有人姓朱有人姓凌，再加上佢哋鍾意朱玲玲！然而，記者最想問，朱凌凌，是演員還是歌手？「我哋體內都流住戲劇嘅血，離不開戲劇。」團長白只解釋道。朱凌凌的音樂戲劇味濃，一首歌說一個故事，例如《李白》借鐵杵磨成針故事諷刺香港填鴨式教育，聽畢像看了一場戲。你以為佢哋將戲劇帶進音樂，嚟緊一月佢哋又會有套舞台劇，亁脆叫《朱凌凌》，劇中只有4首歌！「我哋其實係地下嘅秘密組織！」我懶理他們每5分鐘1個Gag的習慣，悄悄把甚麼「撈過界」問題收起。因為，他們沒界可言！
活在當下這條界
他們的歌，有Rap有Pop有Jazz；他們的身份，有演員有歌手有戲劇導師，最忙時每日最多睡4小時，「正如有人放工回家打機打通宵然後再返工，係唔夠瞓，但佢覺得好正！我哋夾歌，也是這樣！」細佬帶着沙啞聲線道，訪問前晚他們在牛棚演出，「做十件事十件都係鍾意嘅事。活在當下。」
那句「活在當下」餘音嫋嫋，思及他們一月舞台劇《朱凌凌》，內容講友誼及……散Band?!是否假戲真做？眾人七嘴八舌，「Band就散緊㗎啦！」我心中一驚……「不過，散前我哋希望達到少少的目標，就係……」白只一頓，「起碼每人賺700億美金！」無力！又被他們耍了一道，豈料5人再下一城：「又或者上到勁歌就散！」記者反擊，連麥玲玲都可上勁歌，點解朱凌凌上唔到？「咁真係上到，咪唔散囉！」反反覆覆，句句屬實。我明了，朱凌凌應了自證預言活在當下。
農夫同麥玲玲去MK是見Fans，朱凌凌幾乎每個月在旺角街頭獻唱，是增加Fans，佢哋稱為打游擊。今次記者叫佢哋唱3首歌，第1首唱頭幾句已聚來一大群人。雖然麥玲玲無批朱凌凌，還望他們與農夫走勢一樣勁。
游擊隊唱好菜街
