香港偶像買少見少，反而台灣人氣組合越嚟越多，早排飛輪海、棒棒堂先後登陸香港，吸引咗大班瘋狂fans追隨，見佢哋咁受歡迎，香港唔少嘅宣傳活動，都棄用本地藝人，紛紛轉向台灣組合招手，下一個嚟香港嘅台灣組合，係同棒棒堂同一間公司、擁有八位青春玉女成員嘅黑澀會。
逗留三日
黑澀會下月18號殺到香港，逗留到21號先走，其間佢哋會喺觀塘apm主持商場聖誕亮燈儀式，相信呢三日班fans追星嘅場面一定好墟冚。
黑澀會嘅誕生，始於ChannelV嘅節目《我愛黑澀會》，同另一節目《模范棒棒堂》相似，以招募春青少女參加節目，以培養佢哋成為明星為目標，呢個節目深受後生一輩歡迎，今年仲入圍台灣金鐘獎最佳綜藝節目獎，黑澀會成員包括有大牙、小蠻、小薰、MeiMei、筱婕、ㄚ頭、鬼鬼同埋Apple，全部靠靚樣突圍而出。
