堪輿學家麥玲玲（圖）話，大家唔好開心得咁快，皆因如果用農曆嚟計，要過埋立冬（即係11月8號），最好等到9號之後，先至算係大步檻過！
點解逢7嘅年份10月會咁凶險，麥師傅話，有7嘅年份係「丁」年，屬陰火，股市會特別波動，所以每逢「丁」字年，出現股災嘅機會好大，反而「丙」字年，則屬陽火，而「6」字年份，則有利股市暢旺，好似06丙戌年，就係好例子。
至於點解次次股災都咁啱喺10月，原因係，新曆10月通常都會踩到農曆9月，而農曆9月係戌月，係天羅地網格，加上係墓庫位，通常呢個月，對金融股市嘅震動力好大，所以新曆10月會咁惹火。
講到08年，麥師傅話，個市唔會升得咁急，加上代表戰亂爭鬥嘅三碧星，行到去美國，咁國際一哥出亂子，多少會影響香港！佢又強調，出年「一定唔會咁多人再有偏財運」，尤其係屬馬同蛇嘅人，要特別小心，屬羊就大上大落，但都有錢賺，屬牛同龍會幾好！