新世界發展（017）噚日出年報，華華梗係第一時間睇董事薪酬嗰頁啦。新世界07年度嘅董事薪酬總計，彤叔鄭裕彤同純官鄭家純兩父子加幅相當驚人，分別有2.2億同2.4億銀；上年度彤叔只係有30萬銀，純官都不過係1560萬銀。咁彤叔咪加咗732倍人工！嘩，老闆，若然你加華華732倍人工，華華話過，一定鞠躬盡瘁、死而後已、勤力工作……
睇真啲，原來兩人多咗購股權筆錢，各有2.2億銀咁多。若然唔計呢一筆，彤叔呢兩年都只係攞30萬袍金，冇多冇少。
不過咁，齋睇薪金津貼一項，新世界、新地（016）、恒地（012）、信置（083）、恒隆地產（101）五家發展商咁多個董事當中，以純官人工最高，有1730萬銀，加埋130萬花紅，有1860萬銀，高過佢老竇。
如果真金白銀袋落袋嘅，睇薪津、袍金同花紅實際啲，純官嘅薪酬加花紅就加咗24%，有1930萬銀。至於四叔李兆基，舊年喺恒地嘅總酬金有889萬銀，論加幅唔夠純官多，但都有兩成。
至於同恒地好有交情嘅新地，最高酬金嘅董事係黃植榮，連埋袍金、花紅同薪津，一共收咗1351萬銀，不過，以大孖沙級數計，三佬郭炳聯最高有214萬酬金，加咗3.88%。至於大佬郭炳湘人工有206萬銀，加咗3%。以董事酬金計，喺大孖沙當中唔算奀。
信和黃志祥冇人工加
因為信置嘅黃志祥同彤叔一樣，都係冇加冇減。黃志祥跟番上一個年度，酬金122.7萬人工。不過咁，唔加薪酬嘅大孖沙，最出名嘅應該係視富貴如浮雲嘅超人李嘉誠，佢自己都經常話，每年只係𢭃5000蚊人工，只係長實12月年結所以冇得計。
電郵：mailto:[email protected]