當國際足協會長白禮達周二喺瑞士宣佈「2014世界盃主辦國係巴西！」呢個消息時，全世界球迷都唔覺得意外（因為巴西係唯一申辦國），反而左望右望發覺球王比利唔喺度，哇！咁點得㗎？
比利作為森巴足球嘅象徵，喺國家獲得世界盃主辦權嗰刻冇露面，反而出席德國科隆一個體育推廣活動，簡直同婚禮得新娘冇新郎一樣咁荒謬！即使當日有國家隊教練鄧加、「1K射手」羅馬里奧、總統盧拉同足總會長列卡度等撐場，但始終係差啲！
外界傳得最盛嘅原因係話比利唔妥列卡度，起因係93年列卡度外父夏維蘭治（當時國際足協會長），唔邀請比利參加94世界盃抽籤儀式喎！不過，我求大俠覺得最根本原因，係比利一路覺得巴西唔適合舉辦世界盃。
欠缺辦世界盃能力
話說去年巴西總統盧拉提議申辦，當時列卡度都反對後來先轉軚，比利呢把「烏鴉口」就出嚟唱反調：「勞民傷財！」不過，佢知道成功申辦後都出來唱好：「巴西係足球之鄉，可以舉辦2014世界盃太好啦！」
我求大俠麻麻哋鍾意比利，但今次都支持佢。講真，巴西從社會基建、治安同財力等，都欠缺舉辦世界盃嘅能力；好多足球場設施仲差過旺角場（電視直播設施都冇！），你話點辦世界盃？
不過，成單嘢最衰都係白禮達，98世界盃後居然提出按洲份輪流舉辦，於是好似南美呢啲又窮地理位置又差嘅地方，最終得巴西申辦囉！今個禮拜佢又話2018世界盃恢復舊制（由全世界國家申辦），你話係咪攞嚟煩？