前TOM仔CEO王兟轉戰德州太平洋TPG食大茶飯後，雖然低調，但都keep住間中同大家分享吓自己做咗啲乜deal。
好似噚日，TPG下面兩隻由佢話事嘅TPG增長基金，同TPG生物科技投資基金，就宣布投資咗超過3000萬美金入一間總部喺上海、叫ShangPharma嘅生物醫藥研發外包服務商，主要業務係為客提供藥物前體生成、藥物前體優化，同埋合成化學等。客仔包括全球頭十大醫藥及生物科技公司。
市場消息話，呢檔「星花麻」計劃喺2009年上市，由於𠵱家先係2007，所以噚日佢哋個CEO惠欣俾記者「捽」時，猛話言之過早，至於其他數字亦都欠奉。咁i-Bank出身嘅惠欣點解轉行又點同TPG搭上？係咪因為兟哥呢？
佢話轉行係因為5年半前i-Bank唔係咁好景氣，至於點搭上TPG，佢話係一齊認識兟哥同TPG，冇分先後。真係好想睇睇兟哥繼搞煤炭之後，點以生物科技生財！