林青霞做咗闊太後越嚟越低調，好少出席公開場合，前晚佢罕有地同老友陶敏明去又一城睇日本片《東京鐵塔：我的母親父親》嘅首映，首映禮係903IDCLUB同電影公司合辦，所以俞琤就四圍請老友嚟睇，仲有佢好朋友上山詩鈉都幫手，所以青霞畀面撐場。青霞精神煥發，俾記者影完相就匆匆入場，唔做訪問仲越叫越走。
靚靚殲脂35磅
後日係林青霞53歲生日，青霞老友陶敏明囝囝譚俊彥同動漫Maggie李曼筠噚日喺台灣宣傳電影，譚俊彥大爆青霞早排見陶敏明養咗3隻貴婦狗，令佢好想買隻迷你貴婦狗女，其實佢睇中咗隻12,500蚊嘅貴婦狗，今日陶敏明會陪青霞到寵物店揀狗，作為生日禮物。譚俊彥話青霞會將狗女取名「丫鬟」，仲會同陶敏明嘅雄狗配種。之前有傳青霞因婚姻問題導致情緒不穩睇醫生，譚俊彥代青霞否認之餘，仲爆青霞係更年期身體唔舒服，要搵醫生開藥，又話青霞老公邢李火原每日都返屋企食晚飯。
講番前晚嘅首映禮，上山表弟張智霖帶埋老婆袁詠儀（靚靚）嚟睇戲，靚靚就同老公買完嘢食後大講減肥史，佢生完BB後肥咗好多，但前晚見佢幾乎回復以往身段，靚靚話佢𠵱家115磅，差5磅就達到目標，佢月底要拍劇，呢排就日日陪住個仔同減肥。靚靚話：「唔減肥好難拍戲，靚女冇我份，師奶我唔做。我已經喺兩個月減咗35磅。」
