星期日快活谷馬場跑馬，入場人數不俗，但因每場出馬數字有限制，最多十二匹，投注額係比沙田低一啲，相信馬會若非逼於無奈，盡量唔會編排喺快活谷跑日馬，一位練馬師話快活谷日馬有氣氛，啲大人物亦鍾意，因為大人物幾乎全部住在港島，去快活谷應酬易過去沙田好多。不過現實啲講，一切為了投注額，若非現在沙田馬場跑道換上新草，需要時間養草嘅話，馬會始終不願意在快活谷跑日馬。
大人物之中，金管局總裁任志剛在馬場出現，佢與任錦光合資擁有嘅「自己友」在第二場成為第四熱門，左丁山問馬主L太太：「『自己友』咁熱，買唔買得過呀？」L太太答得好直接：「佢冇得做囉喎，運氣點會好？一於唔買！」女士啲反應好憑直覺，左丁山左度右度，「自己友」應入三甲，一於搵佢隻馬做馬膽，點知呢隻馬熱門倒灶，十二匹馬之中跑第九，好令馬迷失望。L太就笑騎騎：「都叫咗你唔好買㗎啦，張張報紙都話任志剛總裁唔會做得耐，政府只會與佢續約兩年之嘛！」
左丁山為之啞然。我哋一向以為金管局總裁冇任職期限，任志剛可以學格林斯潘，做到佢自己唔想做為止。哦，原來以前有人放煙幕啫，金管局總裁一樣係六十歲退休嘅，點解傳媒咁耐以來都被蒙在鼓裏呢？金管局成日要銀行增加透明度，佢自己就從來不公開任總裁嘅任期與退任年齡，唔係幾公道喎。
此日馬場內馬主之間，如果唔講馬就講（一）兩太競選，（二）任總裁，前者太過政治性，一講就分化咗成枱朋友，主人家要主動轉移話題先至得。講任總裁任期就興高采烈咯，幾乎人人都話有內幕，都唔知信邊個好，有一說話任總裁之老友記主動寫信為任總尋求延續合約五年，由今年開始，因任總生於一九四七年，已經滿咗六十歲。政府順水推舟，為任總續約兩年算係畀足面，冇叫佢擇日鬆人。未來兩年，邊個會接棒呢？目前金管局內高層，在銀行界威望不高，升為總裁難以服眾，呢個職位一定唔會由外國人做，人民銀行亦唔方便派人嚟，以示尊重一國兩制。故此人人視陳德霖為大熱門，希望佢唔係「自己友」咁樣倒灶啦。