靚仔幾時都咁着數，加埋係網球健將，小妹最冧，今個月24日喺澳門威尼斯人綜合館舉行嘅「澳門威尼斯人網球爭霸戰」，由現時排名世界第一嘅費達拿，同前世界至尊森柏斯對壘，咁嘅戲碼，小妹撲飛都撲唔切，15,000座位全部賣晒。
執輸行頭慘過敗家，小妹噚日call威尼斯人嘅公關姐姐Kitty，睇吓有冇計，攞張入場券。佢話冇辦法，不過唔緊要，大會即日起推出網上慈善拍賣，有興趣嘅球迷可以上網（ http://www.federersamprasmacao.com）競投「澳門威尼斯人網球爭霸戰」二人鑽石套票，包括兩張球賽入場券及酒店套房住宿連晚餐。
Kitty又話，其他拍品仲有費達拿親筆簽名球衣，佢喺06年度美國網球公開賽勝出嘅簽名照片連相框，同埋由費達拿及森柏斯親筆簽名嘅Wilson球拍框等等。所有網上拍品都係得一份，不設底價。收到，小妹即刻上網bid！
逢周一至周四刊出