萬人空巷、市場傳聞凍結資金達4500億銀嘅內地科網股霸阿里巴巴（1688），唔知係咪樹大招風，寧舍容易招風雨，喺下個禮拜二上市前，都搞單涉及商標侵權案嘅訴訟。
大陸報章報道，一間叫北京正普科技電子嘅公司，今個月19號喺中國國家工商管理總局攞到「阿里巴巴alibaba」嘅註冊商標證書，並且喺23號向北京市場海淀區人民法院提出訴訟，要求馬雲嘅阿里巴巴停止使用阿里巴巴嘅商標，兼賠償200萬人仔。據佢哋嘅代表講，已經通知咗香港交易所同證監會。
篇報道仲有阿里巴巴嘅回應──「是商標局發錯了證書。」話正普科技只有阿里巴巴嘅（植物養護）商標權。原來呢單商標訴訟案已經搞咗7、8年，正普科技話自己喺99年5月14日申請註冊「阿里巴巴alibaba」，而馬雲嘅阿里巴巴要到同年嘅9月9日先喺杭州成立，阿里巴巴反駁，話佢哋嘅網站早喺98年已經運作。
其實，股民最擔心係會唔會影響阿里巴巴上市，不過，市傳阿里巴巴暗盤價已經超過17蚊，比招股價升咗29.6%。