10月31日對於華華嚟講，最開心嘅唔係去海洋公園哈囉喂，而係港股喺10月最後一個交易日，只係「係咁易」跌咗二百幾點，正係無驚無險到4點！港股終於打破10月股災嘅魔咒，華華成個心都定晒。你知喇，過去幾次股災，都喺「7」字年份嘅10月發生，幾邪門，唔少專家同散戶喺9月尾，都估恒指10月會有大調整。
睇番10月，港股何止打破股災嘅宿命，仲大發神威，一而再、再而三創歷史高位，衝破3萬點關口，一度接近32000點，噚日收報31352點。不過，恒指上個月都唔係話完全風平浪靜，喺22號嗰日，就曾經急跌近1100點，個個以為開口中，又嚟個10月股災，好彩第二日嚟過「DeepV」，反彈番1000點。
專家話年底前唔會大跌
嗱，就好似《大時代》方展博向富豪借運一樣，呢個月港股都有富豪為佢打氣，好似香港股神李四叔就修訂後市預測，由原先農曆年見3萬點，改為聖誕過後見3萬3，加上賭王何鴻燊話，港股有力上到4萬點，唔知係咪兩位超級富豪發功，催旺港股。
不過，小心駛得萬年船，股災危機過咗未，華華當然唔可以隨口噏，所以嗱嗱臨問專家。大福證券營業董事杜冠雄話：「𠵱家港股絕對唔平，但喺大量資金湧入下，恒指要再升千幾二千點，並唔困難，11同12月係股市傳統旺季，相信港股下跌空間唔大，估計牛市會持續到明年3月，投資者要注意美國次按問題同日圓套息交易。」
亨達國際研究部董事黃敏碩亦話：「港股年底前走勢都會反覆向上，但估計恒指每次到咗高位後會有3至4%調整，現時嘅後市比較難估頂，投資者要多啲留意市場資金流向，同大陸政策轉變。」
電郵：mailto:[email protected]