賓架Ｌ請三位賓架食飯，席設銀行貴賓廳，搵埋左丁山去，認真畀面。賓架Ｌ博覽群書，對胡適、錢穆甚有研究，佢話某年到日本旅行，隨意咁將錢穆《國史大綱》擺入行李喼，到日本浸完溫泉之後，挑燈讀之，一讀不能釋卷，感嘆自己好似從未讀過歷史書，對錢穆之史識佩服到五體投地。呢日食飯之際，賓架Ｌ叫左丁山讀埋錢穆之《師友雜憶》與《八十憶雙親》，更可了解錢穆治學道理及生平云云。
左丁山啱啱食完碗翅，心情大樂，聽見賓㗎Ｌ咁講，唯唯諾諾，之後仲有東星斑、椰汁燕窩，食得更加心情舒暢啦，一於多啲去讀錢穆大師嘅書。賓架Ｆ來自美國，關心加州大火與次按危機多過《國史大綱》。經佢提起，醒起校友Ｌ家在洛杉磯，於馬拉布買咗一間豪宅做度假別墅，間屋位於山火區，會唔會已經變成灰燼呢？不禁心有懸念。賓架Ｃ昔年曾經駐LA，住在比華利山，佢話加州好多靚屋，皆是木屋，山火一起，火種乘風而至，跌落屋頂，間屋就立即着火，佢啲朋友就領過嘢，之後保險公司要求屋頂一定唔准用易燃物料，要用防火材料，否則拒絕投保。加州山火咁多，災情每每嚴重，有乜好橋防火呢？
賓架Ｃ話曾經有人提議將山區森林，灌木叢分段斬樹，讓禿坡（或禿山）逐段分隔開樹林，避免火燒連環船，一發不可收拾，呢個提議好現實，但因種種原因（一講嚫斬樹就會有爭議），卒之不了了之。
香港好彩天氣夠濕，亦有運氣，唔見有失控山火發生，否則在南區或山頂區發生類似南加州大火之事，就認真麻煩。賓架Ｆ話唔會麻煩得過次按危機嘅，美資銀行對次按撥備，仲未足夠，好似美國銀行咁，撥備嚴重，立即炒三千人，你估其他銀行會完全冇事？咪咁天真啦。因次按危機而帶來之股市波動，加上北水南來大炒特炒，股市波幅巨大，令銀行好頭痛，銀行長期持有之股票、債券須每日markedtomarket（以市值入賬），於是今日上午可以升值一億，同日下午可以虧損六千萬，令到啲高層提心吊膽，精神緊張，大家午飯食翅食燕窩都係減吓壓而已。