今屆亞姐的質素明顯提升，論樣貌真的有如王賢誌所說「靚過晒啲港姐」，加上首度於亞視大埔新廠舉行，予人耳目一新之感，理應看頭十足。可惜這本以為可替亞視省靚招牌的節目，卻換來近年收視新低。凌零發昨日瀏覽香港討論區，從網友討論的「七宗罪」中，大概可了解今次亞姐的失敗之謎。
第一宗罪：賽果異常
張家瑩當選冠軍後被網友狂插醜樣，事實上，當晚晉身八強的佳麗，幾乎每一位的樣貌都比出爐冠軍標青，難怪被網友轟有造馬之嫌。
Mttw：是否現在流行闊口大面的，不知評審的角度，靚的落選，唔靚又當選！
第二宗罪：問題幼稚
在泳衣問答環節，無緣無故邀請幾位補習天王上來，考亞姐中文字、英語及生物題目，猶如校際常識問答比賽，且未能考驗佳麗的急才應對。
abbcde：最搞笑係問題翻炒加無聊，問人個字點讀？畫番個心臟出嚟？串英文？大佬，返學咩？
第三宗罪：抽車造馬
入圍八強的亞姐獲安排參加抽獎爭奪房車，不過當主持見8號張家瑩按了幾次防盜器也沒反應時，竟然鼓勵她按多幾次，令人質疑那部房車是內定送給她的。
hong232hk：抽汽車嗰八個防盜器都是假的，背後還有工作人員按防盜器的。
第四宗罪：主持爭咪
今屆亞姐主持由鬼馬見稱的谷德昭、無綫過檔的王賢誌搭穩穩陣陣的陳啓泰擔當，三人均能獨當一面，可惜卻被網友指經常爭咪，王賢誌又太過得意忘形，整體欠缺合作性。
天使c：王賢誌好似喺度爭嘢講咁，人哋未講佢又要講！
第五宗罪：嘉賓咪嘴
寶島索女吳佩慈過江表演，又穿性感衣裝上陣，令節目生色不少，可惜她唱歌時竟有咪嘴之嫌，當堂大打折扣。至於實力派的Soler賣力表演，卻因節目超時而被迫cut了一首歌，相當慘情。
kill106：「吳佩慈咪嘴咪算囉，點解咪得咁假？掛住做動作，一眼就睇得出！」
第六宗罪：賽制混亂
賽制搞新意並非壞事，但為了創新而亂了遊戲規則，便是本未倒置。如亞姐進行完才藝表演就不需參加問答環節，又無端加入「賢誌飯局」但又只訪問一位佳麗，令評分欠準則，間接製造不公平現象。
磊磊~~：成晚最唔好就係要將問答同才藝分開一半佳麗！好唔公平！冇時間就唔好搞咁多嘢！
第七宗罪：美女變馬
今年亞姐增設有獎競猜遊戲「冠軍大彩池」，現場設有佳麗號碼的賠率版，賠率按佳麗的表現而轉變，雖然頗具創意，但網友批評「彩池」、「賠率」等字眼仿如買馬對佳麗是極大侮辱。
wqwq：當我睇到亞視喺螢幕上顯示各佳麗賠率時，心裏立即感到極為侮辱。
《蘋果》娛樂版設立讀者來料專欄，歡迎大家提供有關藝人的相片、video及有趣網料。請附姓名、電話及電郵地址，電郵到：mailto:[email protected]，網料一經採用，酬勞由$100起。
