華華睇番恒地、信置、新世界同恒隆地產嘅董事局酬金支出，發現以彤叔嘅新世界最多，成7.2億銀，比去年急增咗22倍。雖然話主要係因為彤叔同純官嚟自購股權嘅酬金增加，但都要新世界股價「靚仔」先有咁嘅增長，而要股價升就梗係要有靚業績支持，新世界今年嘅純利有成43億銀，比去年增加3倍，成績咁靚，唔怪得股價一年間升咗成1.1倍，噚日收報28.05元。
至於股神李四叔嘅恒地，07年董事局酬金支出1.2億銀，反而比舊年少咗25%，原因係舊年高薪老臣子梁昇走咗，今年董事開支咪少咗囉！雖然公司今年有近百億盈利，但就比去年跌咗28%，但核心盈利升12%，不過好彩股價表現唔差，一年升咗63%，噚日收69.7元。
地產商中，信置董事局薪酬就最少，除咗同佢嘅董事人數相對另外3家地產商少有關，總酬金過千萬嘅董事得鄧永鏞一個，董事局9位董事酬金合共近3300萬銀，但都比舊年升咗五成半。只係公司盈利增長就差啲，升得4%，好彩股價一年以嚟升咗八成。
陳啓宗嘅恒隆地產，董事局薪金有近6700萬銀，增長18%，雖然07年純利升45%，唔夠新世界多，但股價表現係5間地產公司中最好，一年急升1.2倍。