我貪心，希望有部車可以坐得人多載貨多性能好就正囉！我窮，想買部歐洲SUV滿足慾望兼晒名牌就絕對無可能，但出入返工放工總得有部車代步，若然有部車又平又有齊歐洲名廠車嘅功能就盞囉；千方百計終於俾我搵到，而且比人遲咗一年，但部車由五座變七座功能反而多咗仲轉埋全車皮位同軚飾，個價仲平咗幾萬蚊㖭，今次點計都jetso過人，賺晒！
記者：梁美甜
攝影：陳盛臣
模特兒：Joanne
全車升級皮椅
三菱早在06年已經引入Outlander五座位，舊年嘅價錢接近30萬，銷情理想。代理再下一城，於年初引入七座位版Outlander，價格亦徘徊喺30萬上下，好似話豪華版多咗名牌音響RockfordFosgate同9吋屏幕DVD影音系統就叫價33萬；而入門版就無咗名牌音響同DVD，價錢就平3萬，售26萬9，玩得SUV嘅人，着眼部車嘅性能多過影音享受，若然以相若性能嘅同款車而少咗影音設備但價錢足足平6萬幾，唔使講都知車迷點揀啦！
最近代理仲為部車作出些微修飾，全車座位由絨布換成真皮，又喺軚環加上電鍍飾邊，令整體感覺更統一兼Trendy咗。如果大家再精打細算啲，以同等設備及性能，呢部Outlander比起舊年款轉配全車真皮座椅及飾邊，仲多咗兩個位但就平多3萬蚊，計落抵玩好多。
多咗乜嘢？
唔計真皮椅、軚盤裝飾等細緻位，新版Outlander最大特色係加多咗一排位，閒時毋須坐七個人，大可拉低當特大尾廂咁用，相當之靈活。
性能媲美 歐洲SUV
今年SUV車系大熱，歐洲名廠都相繼推出SUV，佢哋出品嘅SUV唔使問質料同鋼水都有質素保證喇，但係個價亦相對地保持係百萬水位，平啲嘅都要成4、50萬㗎，我自問身家有限，有百萬不如買層樓，買車都係用來代步，若然功能多啲就已經算賺咗。
Outlander7SUV嘅Function拍得住歐洲車，170匹2.4公升Mivec引擎，加上可選擇2WD及4WD的四驅系統，軚盤仲設PaddleShift撥板，令無段變速波箱亦可作六段+/-轉檔，操控就手又容易，返工返學上山郊遊樣樣得，最盞係價錢都只係二十零萬，平歐洲車幾條街，個外形仲一啲都唔輸蝕，行出嚟都踩得吓兼有型格，抵玩到暈啦！
後排落車不求人
OutlanderSUV7可以話係近期有實力嘅經濟SUV之一，三排座椅唔用後排收喺暗格，尾廂可以擺足四五件大行李，容積大到暈。大家有無試過坐後排嗰陣，中排啲屋企人又或者朋友落晒車之後唔記得咗你變困獸鬥，無人理你要自己郁手都幾麻煩，呢部Outlander就有個搞鬼Function，喺尾排兩邊都有個掣，只要中排無人坐，按一下個掣，中排座椅就會自動收起，好個不求人，諗真啲都係一份細心同體貼嚟嘅！
再者，香港大部份家庭都屬於小型，只得兩三個人，照計一部房車仔已經夠坐夠用，但一時興起全家出動去野餐又或者出埠就好難講。所以自己不嬲都鍾意穩陣，揀心水都係部SUV至實際，起碼平日代步之餘，有咩慶典盛事郊遊出埠都好，小貓三四隻又或者一大班人再加幾件行李都可以輕鬆應付。
三菱Outlander7SUV規格
引擎：2,359c.c.直四
馬力：170ps/6,000rpm
扭力：226Nm/4,100rpm
傳動：CVT無段變速，四輪驅動
查詢：環宇汽車（24119511）
