恒指難過7字關，倒數上一個十年，同香港人一齊慶祝建華七年開始嘅，係97金融風暴。
回歸前中國資金熱炒慶回歸，恒指升到癲，大家忽略咗亞洲其他國家好似泰國、印尼、馬來西亞，已經有大鱷肆虐，一味沉醉喺股樓屢創新高嘅泡沫當中，點知大鱷蹂躪完亞洲各國，終於輪到香港。回歸後冇耐，10月就嚟個大跌市，由9月30號嘅15049點，直插到10月尾10623點，一個月內足足跌咗4426點，跌幅三成咁多，最低試過跌穿1萬點，得番9059點，搞到人心惶惶，香港經濟就係咁沉寂咗幾年。
再上一個十年──87年，正係電視劇《大時代》描寫嘅背景，當時地產股同樓市升得過熱，點知美股一日跌500點成為導火線。
當年恒指跟隨外圍跌，仲歷史性停市4日，恒指由9月30日嘅3943點直線下瀉，到10月尾得番2240點，跌咗1703點。