真係諗唔明，點解杯麵加價都會關車主事。早排，日本即食麵界老大哥「日清食品」同麵包食品一哥「山崎麵包」（即係之前收購了著名餅店「不二家」嗰間公司），都先後公佈旗下食品將會加價，加幅由7%~10%不等！對於香港人來講，加價已是家常便飯，但對於通脹率極低的日本就唔同講法，日清食品17年無加過價，山崎仲勁，24年無加過價，但今次加幅達一成，所以引來不少回響。
農民改種特種黍米
山崎麵包解釋加價原因係因為近年可以代替汽油的「生物燃油」盛行，好多農地都改為種植可以提煉成燃油的特種黍米，結果令種小麥的農地減少，作為麵食原料的小麥因此漲價咁話喎，換言之即食麵同麵包加價都係各位車主惹的禍。姑勿論呢個係實情還是大機構想找個藉口減低市民對佢哋加價的反感，但作為車主真係越來越有罪惡感，已經一直背負住污染環境的罪名，以為用燃燒後二氧化碳及其他污染物釋出量極少的生物燃油可以支持吓環保，點知人哋又話你搞到杯麵加價！咁你到底想我點呀？
文：周達之