Car通:<br>黑魂哈利只賣一年　105周年限量巡航

Car通:
黑魂哈利只賣一年　105周年限量巡航

速度唔係最快，馬力唔係最大，但Harley-Davidson，一定係電單車最經典品牌。為慶祝誕生105周年，08年款新車之中有幾架限量特別版，黑銅顏色配撘，加上紀念標記，今年唔買就冇，已經夠理由要哈利迷乖乖畀錢。
剛過去嘅星期日朝早，本應靜局嘅沙田工業區傳出強勁低沉嘅轟轟聲，係哈利嘅引擎聲，更加係一班大男人對哈利致敬嘅歡呼聲。
放假都唔瞓晏啲，二十幾度披件皮褸出嚟，你哋係咪儍㗎？

文：嘴嚼爺　攝影：譚盈傑

■啞黑油缸沒有紀念徽章，不過一睇顏色都知係特別版。

■引擎位嘅磨砂效果比電鍍特別得多，易打理而且好有型。

限量版一門四傑

105周年限量版，有配上啞黑色油缸加磨砂銀引擎嘅Sportster同V-Rod，仲有以銅、黑色調為主嘅DynaSuperGlideCustom同FatBoy，繼續配上大量招搖電鍍配件，就好似一個着住新衫趕住上擂台嘅大隻佬摔角手。
車身設計引擎馬力冇乜變動，但就加上只有紀念車系先有嘅105周年徽章以及刻上車身編號，係限量版身份象徵，而每一個型號都有唔同嘅限量數。
全球限量4,000架嘅FatBoy外形當然最經典，而全黑嘅V-Rod流線車身就絕對係哈利近年最佳新作，不過，筆者覺得當中最吸引都係一架Sportster，啞黑油缸低調地話你聽係特別版，而引擎嘅磨砂處理更表現獨特品味，最緊要係Sportster係哈利車系中最擁有街車Feel嘅一款，就算日日揸嚟代步都唔會好誇張。
馬力方面，百幾匹推一架幾百磅電單車，力量當然狂轟湧上，雖爆炸力不及超級跑車，但哈利咁有型，梗係漫遊俾人欣賞先啱數。

花十萬改剩車架同引擎

香港地，玩哈利班車友都好齊心，一有活動就空群而出。今次呢個慶祝活動就引嚟最少30架哈利電單車到場，當中有入型入格嘅鬍鬚肥鬼，有一家大細有叔叔有後生仔，仲有細細粒P女。不過講到最勁，都係呢架黃色FatBoy，車主阿華花十萬蚊同無限心機改到架車面目全非，除引擎同車架係原廠之外，其餘全部改裝料，有好多更係度身訂做只此一件，唔係睇見佢副V偈，都認唔出係哈利。

■魔鬼形把手、倒後鏡好搶眼，但車主阿華反而好低調，唔肯上鏡。

■油缸除噴上黃底及骷髏頭圖案，仲加長尾部，正常埋尾位冇咁尖。

■指揮燈融入車架，不過遠睇難分左右燈。

■大量訂做十字裝飾，出面無得賣。

現場花絮

■呢位西人改到個手把好高，日本同美國興咗好耐，揸得辛唔辛苦已屬後話，型仔搶眼先最重要。

■現場請嚟兩西一中Model，好鬼狂野，呢啲Camp就真係去得過呀！

半年買4架哈利豪！

其中一位車主楊先生就厲害喇，佢喺半年之內分別訂咗FatBoy、V-Rod等4部哈利，最奇特係原來佢考咗電單車牌一年唔夠，有錢真係好，唔使問點解。
「突然間好鍾意，覺得Harley-Davidson係電單車中最經典嘅，揸電單車嘅一定要揸過佢。而且佢好多款式都各有風格同吸引之處，所以越買越多。」

話你知
08年先105周年

Harley-DavidsonMotorCompany成立於1903年，由WilliamS.Harley、ArthurDavidson和WalterDavidson三兄弟在美國威斯康辛州的密爾沃基創建。創辦人之一嘅WilliamS.Harley，在1901年已畫出能裝在腳踏車架上面的引擎草圖，而在1902年便製造出第一輛機車，其後是03年才把Harley-Davidson註冊商標。計落條數，下年08年才是哈利的105周年紀念。

Sportster1200Nightster

引擎：風冷V2
排氣量：1,200c.c.
扭力：107.1Nm/4,000rpm
傳動：5前速波箱
車價：$135,000

■Sportster係哈利車系中比較「Slim」嘅一款，唔太誇張地肌肉化，唔增肥練大隻都啱揸。