全球最快　E-3對焦王

OlympusE-1已經推出一段時間，面對對手不斷出新機，自然滿足唔到用家嘅要求，所以E-3可以話千呼萬喚，唔少人都話等住佢出！有咩咁巴閉？首先係與同級DSLR睇齊，相片質素達千萬像素，並備有11點雙十字對焦系統，號稱速度最快，再加埋扭擰LCD，拍攝方便之餘夠晒睇頭喇！

記者：許福合　
攝影：伍慶泉　
Model：Mandy

扭擰LCD復出

從外觀睇，E-3機身相當實淨，睇埋「骨架」的確相當堅固，用落好放心，即使拎上手亦覺得機身非常輕。據資料顯示，機身具備防塵、防水滴特點，即使中高檔用家亦能滿足拍攝需要，以應付不同環境。
同E-1相比，E-3最大改變可能係機背部份，最搶眼當然係支援可以翻轉的LCD屏幕，突破現時單鏡反光相機拍攝時受觀景器的限制。而呢個功能當然唔少得LiveView支援，機背可以見到快速切換鍵，可以輕鬆於觀景器及LiveView之間轉換，而且實際效果睇落更係同觀景器無異；配合可調校角度LCD，無論高影低拍都好方便！加上E-3具備少見的1.15倍放大率，預覽效果特別清楚。

■E-3機身硬淨，全因呢個鎂合金骨架。

雙十字對焦

E-3號稱擁有全球最快對焦系統，拍攝時即使用慣單反相機影相嘅攝影師，亦大讚其對焦速度；不過筆者試用時，首先要習慣其對焦系統嘅改變，一般相機都採用半按對焦嘅設計，E-3就無咗半下觸感，基本上按下快門就會立即對焦及拍攝。對焦系統採用11點每點雙十字，包圍整個主要畫面提高準繩度，從而提高對焦速度。不過要享用最高速對焦，還需配搭最新SWD超聲波對焦鏡頭拍攝。