「白花油王子」顏福偉涉嫌非禮男的士司機，日前遭警方拘捕，保釋候查，事件令圈中人嘩然。顏福偉母親顏何秀瓊昨日接受本報電話訪問時，激動力撐兒子，直指其子有潔癖，絕不會搞污糟事。
曾公開揚言「男女都冇所謂」的顏福偉，被指於本月非禮一名男的士司機，被警方拘捕，後准以2,000元保釋候查。事件日前曝光後，他即時離港避鋒頭，前日一臉沮喪的他由女助手陪同飛往美國。
阿媽激動
稱拜佛幫理不幫親
顏福偉前日回應被指涉嫌非禮被捕時，曾說：「我好㷫，好嬲！」記者昨日聯絡了他母親、顏玉瑩三姨太顏何秀瓊，她在電話中同樣「好㷫」，激動地力撐兒子。問她對事件看法，顏媽媽說：「你話呢？有頭腦嘅人，有智慧嘅人都知乜事啦，我梗係信佢！」她續說：「呢個係事實，唔係因為佢係我個仔，我係拜佛嘅人，係幫理不幫親嘅，你哋有頭腦，有智慧都諗到，嗰啲係夾硬嚟屈！」
問顏媽媽兒子是否已向她解釋事件，顏媽媽只是勞氣地說：「第一件事，我個仔愛亁淨，有潔癖，佢同人握完手都要洗手，咁亁淨嘅人，點會做啲咁污糟嘅嘢？我要講係咁多。」隨即收線。事實上，顏福偉與母親何秀瓊感情甚好，他父親、白花油創辦人顏玉瑩過世時，他曾經為維護母親，在靈堂上與另一房人大打出手。
曾拍攝白花油廣告的梁家仁身在北京，他指對事件不知情，了解後只說：「吓，咁大件事？我同佢係好朋友，我唔會評論。」顏福偉的好友鄧浩光則說：「我未搵到佢，我全日出咗去開會，但我知佢有打電話返公司，處理公司事務。」有消息指事件由鄧浩光爆出，更指他是顏福偉「緋聞密友」，鄧浩光即時說：「唔係我講出嚟，係雜誌打嚟問我幾句，我話我都係上網睇先知單新聞，咁佢哋就咁寫，我都冇辦法。」而曾與顏福偉傳緋聞的袁潔瑩，一聽電話即說：「我冇睇新聞，我做緊facial，我唔方便講電話。」
錯在貼士
「有目的先畀咁多錢」
名人明星對事件議論紛紛，火速成為城中熱話。「鯊魚女」陳細潔說：「我成日喺ball同活動見到佢，佢平時個人幾紳士，好正常又幽默，生活又健康，唔似係啲咁嘅人。可能佢淨畀車錢，唔畀貼士仲好，淨畀車錢人哋，人哋咪當你飲醉酒，但你畀咗$500，司機咪覺得你係有目的先畀咁多錢。」
陳淑蘭昨日回應說：「顏福偉個人都幾熱情，冇乜公子哥兒嘅架子，我覺得飲咗酒之後，可能係玩，係冇心之失，可能佢嗰晚開心，熱情澎湃得滯。」名模陳沛嘉則說：「佢含蓄得嚟幾謙虛，我唔評論任何人嘅性取向，只要開心就得。至於信唔信，我會偏向相信佢多啲。」
採訪：林妙萍
娛樂資料庫：涉性醜聞水洗難清
顏福偉日前被指涉嫌非禮的士司機聲譽受損，而過往不少中外明星都曾牽涉性醜聞。
容錦昌
02年被指在男廁內偷看別人小解，一名男子報警後警員以涉嫌遊蕩罪將容拘捕帶署，最後因證據不足而獲釋放。
尹天照
王秀琳04年聲稱遭尹天照在車廂強吻，其後往警署報案指他非禮，尹被帶署協助調查，隨後接獲警方不予起訴的通知。
大衞高柏飛
魔術大師大衞高柏飛涉嫌於今年7月在巴哈馬強姦一名女子，華盛頓州西雅圖聯邦大陪審團已接手調查。
資料來源：《蘋果》資料室
人物誌：叔侄分掌大權
顏福偉的父親是白花油藥廠創辦人顏玉瑩，共有四位妻子，顏福偉是顏玉瑩與三姨太何秀瓊所生的兒子，家中排行第五。顏玉瑩於1981年去世，遺留下來的企業主要由顏福偉和長孫顏為善接管，台灣方面的白花油廠，則由何秀瓊打理。
一網講盡：「呢次要搽定白花油」
顏福偉日前被指涉嫌非禮一名的士司機，事件傳出後旋即成為網友討論話題。
JUNKO（香港討論區）：顏福偉激到司機都發火，要告到白花油王子褲都甩，呢次顏福偉要搽定白花油囉！
~sally~（Uwants討論區）：睇完篇新聞O晒嘴，估不到他大膽成這個樣子！
武名治（香港討論區）：可能遲啲個廣告係福仔飲醉想做壞事嘅時候，突然拎支白花油，索一索，醒晒！
hwwong（香港討論區）：呢次真係用白花油冲身都未必甩到身！
-野孩子-（Uwants討論區）：我除咗得個笑字，冇嘢好講！
