新世界發展年報嘅董事酬金中，今年多咗個好重要嘅人，就係彤叔長孫、純官乖仔鄭志剛。佢可以話係鄭氏第三代接班人，今年3月先加入新世界發展做執董，兼做埋新世界中國（917）及新世界百貨（825）嘅執董，一兼三職，後兩者雖則話老竇純官至係主席，但查實鄭志剛一上場冇耐，就主導咗呢兩間公司，可見佢好得阿爺歡心。
07年度可以話係佢喺家族生意入面，第一年𢭃董事薪酬，合計260萬銀，淨計薪酬、花紅同袍金，就有160萬銀。雖則一身兼三職，佢上年度喺新世界百貨冇攞一蚊一毫，而喺新世界中國亦只係有37.2萬銀，其實唔算多，不過新人出道，唔可以吓吓計錢，最緊要學嘢啫，反正盤生意遲早都係交畀佢。