阿仙奴嘅西班牙國腳中場法比加斯今季踢到曉飛，幫球隊喺英超聯同埋歐聯分組賽排榜首，計埋前晚英超聯對利物浦嗰一球靚波，暫時入咗成10球，仲做咗球隊首席射手㖭；而我求大俠八到佢嘅原動力，唔係特訓或乜嘢營養餐單，竟然係零食。
法比加斯貴為英超聯其中一個最頂級嘅球員，又係效力阿仙奴呢啲大球會，飲食照理好健康，但實情剛剛相反。幾個禮拜前，佢就俾人踢爆超鍾意食可以滿足你3個願望嘅朱古力蛋同埋飲可樂。咁都未夠，日前佢仲承認非常鍾意食零食，其中冬甩更加係佢嘅至愛。佢咁講：「有時喺主場比賽完或者放假嗰陣時，我會去冬甩店買外賣。我返停車場攞車時見到啲人坐喺車裏面食冬甩，感覺好似喺的士高開冬甩派對咁，真係好正。」
冬甩可樂好好味
法加比斯仲話，佢相信阿仙奴領隊雲格唔會向佢落「禁吃零食令」。佢咁樣解釋：「我都知道呢啲食物對身體好唔健康，所以我會適可而止，間中食少少過吓口癮就算。唔怕話你知，我喺西班牙時試過食煙，仲要係我屋企人畀我嘅，但𠵱家冇再食煙囉，因為我覺得陣味實在好難聞。」
法比加斯食冬甩、朱古力蛋同埋飲可樂，係就係好唔健康，但都好過阿仙奴名宿麥臣咁，吸毒、酗酒同爛賭。更何況，佢嘅年紀雖則唔算好大，不過都成20歲人，應該識得分邊啲嘢應該做、邊啲嘢唔應該做。話時話，如果佢季尾幫阿仙奴重奪英超聯錦標同埋首奪歐聯，佢食幾多冬甩同飲幾多可樂，相信阿仙奴高層同埋球迷都唔會介意。