我哋好多時都會用High呢個形容詞嚟形容地位同氣質，咁用來形容NissanCube你又聽過未？本來Cube四四方方成個盒咁，主打年輕潮人市場，不過今日呢部Cube就將成架車扭轉，內櫳全改成歐陸風味，除咗車櫳全用上米色格仔風格佈置、再襯鍍銀飾邊嘅中控台外，兩排座椅更係舒服到令人想瞓覺，簡直如置身歐式睡房中！
記者：梁美甜
攝影：林栢鈞
模特兒：Catherine
靚料改內櫳 豪！
「勞斯萊斯」呢個名字所代表嘅就係又貴又豪，於是乎當一部車話佢裝有勞斯萊斯皮位、羊仔毛地毯以及隔音皮頂嘅話，相信你同我只聞其聲都即時想像到部車一定好HighClass兼舒服！單憑聽已經唔能夠滿足我，一定要親身試過摸過揸過先至滿足。車門一開，「嘩！好靚呀！」含蓄啲嘅咪「幾靚囉！」全個內櫳以米色勞斯萊斯皮料包裹，格仔皮椅及天花，仲有幾張羊仔毛地毯，講真，見到地毯毛潤澤又柔順，做枕頭套又或者攬枕就正，用來踩真係十萬個唔願意兼唔捨得！之不過用靚地毯先至凸顯到佢嘅「豪」嘛！
BOSE喇叭 正！
除咗個樣，四方Cube更改裝咗BOSE音響系統、擴音機同分音器，再加多個5.1DTS音響，名牌音響設備，音色圓潤夠震撼，坐喺車廂閉上眼睛，環迴立體而來嘅音樂令人恍如置身演奏廳之內，若然音樂Rock啲就以為落咗Disco㖭！呢套靚音響莫講話聽歌，就算開P都夠用，High到暈！既然可以開到咁大聲，就算聽緊Natasha都可能俾人誤以為MK人「焚」機降晒格，所以Cube嘅頂層勞斯萊斯皮就加埋隔音功效，就算聽乜都無損High爆嘅心情同豪裝嘅HighClass地位！
掟Track任扭 爽！
鍾意Cube嘅人多數都唔係追求速度或性能，因為Cube兩樣都無，反而車仔四四方方空間大夠實用至啱改裝，任車主改到啱自己Style。見車仔細細即時膽粗粗走番轉，仲大膽到走落Track掟番圈㖭！跑Track速度一定快，可以清楚感受到Cube嘅超爽操控，軚輕反應敏銳，不過掟彎始終有少少側，咁就轉彎唔好掟囉！個人最鍾意係線位高可以清楚睇晒四周嘅路況，走兩個圈之後嘅結論係：「爽！」若果你要有歐陸豪華Feel又要速度大馬力兼跑格，唔該搵過部法拉利再改喇！
NissanCube五座位改裝版規格
引擎：1,386c.c.直4DOHC
馬力：98ps/5,600rpm
扭力：14.0kgm/3,200rpm
傳動：4前速自動波
查詢：富利堡（28776700）