小妹呢幾日唔想見人，早前塗咗啲面霜，唔知點解搞到塊面又紅又腫；面霜生產日期係舊年，保質期三年，有排都未過期，估唔到出事，梗係要同消委會啲老友投訴。
點知老友反問我樽面霜開封咗幾耐。哦，都有成年嘞。老友話，咁唔怪得啦，雖然樽嘢未過保質期，但一開封就同保質期無關，都有可能變壞。所謂保質期，係指產品開封前嘅保存期。至於開封後使用期有幾長，歐洲嘅產品根據歐盟化妝品指引規定，有標示開封後嘅使用期，但香港冇法例規定，產品標籤只有保質期，冇開封後嘅使用期。
咁即係點呀？老友話，咁就要自行判斷開封後嘅使用期，一般嚟講，化妝品開封後嘅使用期長短視乎幾個因素，防腐劑含量少或不含防腐劑，開封後使用期只有1至3個月；產品主要用喺眼部如睫毛液，使用期較短只有約6個月；瓶口越大，產品與空氣接觸機會較大，使用期約6個月，瓶口較小如牙膏，使用期達24個月。如果成日用手直接刮取化妝品，產品被污染機會較大，使用期會較短，與其他人共用，產品壽命更短。
老友話，如果發現產品有變色、發出異味、油水分離咁，就唔好用。每次使用化妝品前要洗手，或用膠棒刮，用後盡快關緊瓶蓋，唔好被太陽曬，化妝品壽命會長啲。
逢周一至周四刊出