貿易K睇完星期四本欄之「打工仔須知」，打電話嚟報料：「喂，打工仔確係要知道自己嘅地位先至得嘅，咪以為自己真的是位高權重，董事會內之大股東一旦對你唔高興，話知你係老臣子還是開國功臣或是曾經立下豐功偉績吖。嗱，我啱啱知道一間大機構要搵人做CEO。原本嘅總裁（原總裁）在機構工作三十幾年，一直忠心耿耿，機構內啲老人家退晒休之後，董事會就提拔佢做CEO，一做已有十年，十年來機構業績不過不失，跑唔贏大市，但因為原總裁做得太耐嘞，以為董事會內嘅洋人（代表洋股東）唔識香港事，本地董事年紀太老，仲要倚賴佢，於是用人破格，居然請自己位千金做高級職位，培養女兒做接班人。」
「呢啲叫做不知大細，誤以為自己係家族企業嘅大老闆，可以隨時任用親人。機構內嘅其他高級職員條氣唔順，向洋人董事打報告，向班本地董事投訴，結果呢，董事會認為原總裁用人唯親，乘機話埋佢做總裁期間，機構業務冇大發展，相對地不進則退，請原總裁退位讓賢。原總裁估唔到董事會有此一着，立即向猛人請求幫忙說項，但米已成炊，董事會寸步不讓，原總裁唯有執拾舊物，預備離開自己奉獻一生青春嘅老地方。」
貿易K報料確證咗「趙孟能貴之，趙孟能賤之」呢句古語嘅應用性，高級打工仔豈可不慎哉。貿易K開玩笑咁問：「你或者邊個老友有興趣去應徵呀？」真係識得講笑，人哋自然會搵獵頭公司做search或者自內部擢升，點會輪到一啲過氣人物去做！好似廣播處長咁，雖已登報招聘，政府同時亦委派獵頭公司KornFerryInternational去獵頭，如果你收唔到AndrewTsui嘅電話，怕都唔使嘥時間去寫應徵信喇啩。香港電台大概風水唔好，不合八運，頭頭接連出事，邊位去做新處長，即使私人掏腰包請紫微楊教路，恐怕已經太遲。師傅教落，得罪老細，注定冇運行，趙孟堅決要「賤之」嘅話，有好多手法，神仙難救，哀哉。