當年以主唱民族國歌走紅嘅張明敏噚日突然打電話畀八方，話要炮轟港台《自由風自由phone》節目主持吳志森，佢老哥話，吳志森喺呢個月24號嘅節目中，話「嫦娥一號」衞星升空，帶咗32首歌曲上太空播出，裏面冇一首係由香港人包辦作曲、填詞同主唱，佢引述吳志森當時講：「呢個係失敗嘅地方。」張明敏就反駁指，其實今次升空歌曲中嘅《我的中國心》就係如假包換嘅香港歌曲，由作曲嘅黃福齡，到填詞嘅黃霑，以至唱歌嘅張明敏本人，都係香港人。佢勞氣咁話：「我為咗呢件事失眠咗兩日，作為港台主持人應該查清楚，唔應該亂咁講。」佢話會喺今日登報，要求吳志森喺節目度澄清番。