投資關係專家A有一個寶貴學位，就係科技大學EMBA（行政工商管理碩士），呢個學位巴閉㗎，因為今年《金融時報》嘅世界EMBA排名榜之中，科技大學/Kellogg課程排名第一，而且科大/KelloggEMBA嘅年薪最高，有三十一萬五千三百九十七美元（以七點八計，就係二百四十六萬元，比畢業前增加84%）。
左丁山以前問過專家A：「攞咗科大KelloggEMBA之後，有無加薪八、九成呀？」記得專家A話：「同學就唔知，我就肯定冇，不過我讀完書就轉工，加薪幅度令我感覺良好。」當然，二百四十萬年薪係一個平均數，未必人人如此，但可以相信。另一方面，攞完學位，加薪幅度有八成四？左丁山就覺得好神奇。
點解下下要寫科大/Kellogg呢？因為美國西北大學嘅KelloggSchoolofBusiness一如Kellogg，係一個名牌子，與其他學校合辦課程，當作係franchising，前科大商學院院長，現財經事務及庫務局局長陳家強曾在西北大學教書，與西北關係良好，科大辦EMBA之時，借Kellogg個名一用，高招也。不過科大都幾爭氣，搵人條裙冚自己對腳之後，努力上進，卒之將Kellogg/HKUSTBusinessSchool嘅EMBA課程辦到有聲有色，力壓Wharton（去年第一）與哥倫比亞/倫敦商學院（去年第二），成為世界第一名。反而正宗西北大學嘅Kellogg排名第十三，與德國WHU合辦嘅課程排第十二，與加拿大約克（York）大學合辦嘅課程排第十七，仲低過香港中文大學獨自辦理嘅EMBA（第十五名），其他香港區大學嘅EMBA課程不入前九十名。
陳家強走咗去做官，科大商學院副院長GaryBiddle（白國禮）就俾香港大學挖角，成為港大經濟金融學院院長。實力有冇受影響呢？陳家強係財務學專家，白國禮係會計專才，同屬商學院範疇，鄭國漢係經濟學專家，有稍微不同。港大向科大挖走副院長，當然雄心勃勃，想話在MBA教育中爭番一席位啦，所有本地大學目前嘅頭痛問題係，外國一流商科教授人工好高，年薪二百萬港元請佢哋唔郁，此外空氣污染住宿及國際學校冇位，都係招聘外國人嘅大障礙。