港股今年炒到㷫烚烚，恒指年初至今狂升近六成，噚日仲突破埋31000點關口，唔少散戶都賺到盤滿缽滿。華華噚日收到「新論壇」做嘅第三季經濟信心指數調查報告，發現今年港股大牛市，帶挈好多中產家庭賺唔少錢，荷包脹咗，對經濟嘅信心自然增強！
根據個調查報告，喺中產家庭入面，有買股票或基金嘅家庭，對經濟信心指數有113.9，比冇投資股票或基金嘅家庭高出22點，後者嘅經濟信心指數只有91.9。兩者喺家庭財政狀況指數嘅差距仲大，有成34.3點，兩者分別係112.7同78.4（見表）。
曾淵滄：三萬點高追制唔過
不過，城市大學MBA課程主任曾淵滄話，家陣有買股票嘅中產人士，雖然情緒高漲，但如果香港金融政策有調整，港股好景幾難維持，到時幾高漲嘅情緒都會即刻沉晒。至於冇買股票嘅中產人士，唔使等金融政策有變，根據個調查，佢哋𠵱家已經發覺生活質素差咗。
即係話，中產情緒好唔好都係因為股市，咁深受散戶愛戴嘅曾博士又點睇家吓嘅股市呢？佢話家陣股市肯定有泡沫，嗱，聽清楚係「肯定」，資金估計嚟自內地例如QDII同其他渠道，唔信睇吓近排港股屢創新高就可以引證。
所以佢提醒大家，𠵱家冇炒開股票嘅人都係唔好沾手，現階段唔適宜入市，喺三萬點高位先嚟高追，輸嘅機會好大，制唔過。
電郵：mailto:[email protected]
