近年風頭俾香港股神李四叔蓋過嘅首富李超人，最近接受《金融時報》訪問，大談佢發迹往事之餘，仲提到華華同大家都好想知道嘅事，咪就係佢對小超人、小小超人嘅安排囉！
佢喺訪問度提到小超人22歲加入長實（001），由低做起，家吓已經係集團負責人，懦弱無能冇主見係做唔嚟，兜咗個圈讚小超人有能力兼有主見。
咁小小超呢？之前李超人同小小超因為電盈（008）賣盤事件，引起傳媒關注佢兩父子關係。李超人話小小超有自己事業，應該唔會返長和系幫手，不過李超人喺外國啲私人業務，適當時候可能由小小超幫手打理。其實呢個安排，之前超人都透露過。
咁咪即係超人已做定接棒部署，由小超人主理香港上市王國，至於小小超就喺外地發展。一直好強調合約精神嘅李超人仲話，兩個仔都有受佢影響，做嘢好有原則，遵守合約精神去營商咁話。
佢又講咗香港人好關心嘅雙普選問題，話佢有生之年一定見到特首同立法會有雙普選，但係普選機制要係香港有實質益處同循序漸進之下制訂。李超人年屆八旬，曾特首真係要加把勁，唔好令佢老人家失望。